प्रतिनिधी | विनोद लोखंडे
अकलूज
प्रसन्न पब्लिकेशन हाऊस व प्रसन्न नवोदय फाउंडेशन यांच्या वतीने आयोजित करण्यात आलेला ‘प्रेरणादायी शैक्षणिक नेतृत्व गौरव पुरस्कार’ सोहळा रविवार, दि. ९ ऑगस्ट २०२६ रोजी अकलूज येथे उत्साहात पार पडला. या सोहळ्यात चांदापुरी केंद्रप्रमुख राजू गोरवे यांना त्यांच्या उल्लेखनीय शैक्षणिक कार्याबद्दल ‘प्रेरणादायी शैक्षणिक नेतृत्व गौरव पुरस्कार’ प्रदान करून गौरविण्यात आले.
ज्ञानदानाच्या क्षेत्रात समर्पित भावनेने कार्य करत विद्यार्थ्यांच्या सर्वांगीण विकासासाठी तसेच भविष्यातील अधिकारी घडविण्याच्या दृष्टीने राजू गोरवे सातत्याने प्रयत्नशील आहेत. विद्यार्थ्यांच्या बुद्धिमत्तेला नवे आयाम देत निष्ठा, प्रामाणिकपणा आणि परिश्रम यांच्या माध्यमातून ते ज्ञानसेवा बजावत आहेत.
‘समुद्रातील जहाजांना बंदरापर्यंत पोहोचण्याचा मार्ग दाखविण्याचे काम दीपस्तंभ करतो; त्याचप्रमाणे चिमुकल्या विद्यार्थ्यांच्या उज्ज्वल भविष्यासाठी राजू गोरवे हे दीपस्तंभाची भूमिका बजावत आहेत,’ या भावनेतून त्यांच्या शैक्षणिक योगदानाचा गौरव करण्यात आला.
सौभाग्य मंगल कार्यालय, माळीनगर, अकलूज-टेंभुर्णी रोड येथे दुपारी २ वाजता आयोजित करण्यात आलेल्या कार्यक्रमात आमदार उत्तमराव जानकर यांच्या हस्ते राजू गोरवे यांना हा पुरस्कार प्रदान करण्यात आला.
- राजू गोरवे यांच्या या सन्मानाबद्दल शैक्षणिक, सामाजिक तसेच विविध क्षेत्रांतून त्यांच्यावर अभिनंदनाचा वर्षाव होत आहे.
