मुंबई : खडकवासला कॅनॉलच्या पाण्याच्या अनियमिततेमुळे इंदापूर तालुक्यातील शेतकऱ्यांचे मोठे नुकसान होत असल्याचा मुद्दा उपस्थित करत ‘जय हनुमान बहुउद्देशीय संस्थेचे अध्यक्ष तानाजी मारकड यांनी ज्येष्ठ नेते शरद पवार यांची मुंबईतील सिल्व्हर ओक निवासस्थानी भेट घेतली.
गतवर्षीच्या उन्हाळ्यात खडकवासला कॅनॉलच्या पाण्याचे अनियमित वितरण आणि व्यवस्थापनातील ढिसाळ कारभारामुळे शेतकऱ्यांची उभी पिके जमीनदोस्त झाली असून लाखो रुपयांचे नुकसान झाल्याचे निवेदनात नमूद करण्यात आले.
शेतकऱ्यांना हक्काचे पाणी नियमित मिळावे, तसेच पर्यायी व्यवस्था म्हणून उजनी धरणातून उचल पाण्याची व्यवस्था करण्यात यावी, अशी मागणी तानाजी मारकड यांनी निवेदनाद्वारे केली.
यावेळी संस्थेचे सरचिटणीस अविनाश मोहिते यांच्यासह पदाधिकारी उपस्थित होते.
