जायकवाडीतील पंचरंगी ध्वजावरून गैरसमज पसरवू नका; चिखलीकर, निर्मले, खिल्लारे यांचा संबंध नाही : नरेंद्र गायकवाड
ई आर न्यूज मराठी | लोहा :
प्रतिनिधी – बालाजी शिंदे
जायकवाडी वसाहतीतील पंचरंगी ध्वजाच्या प्रकरणावरून आमदार प्रतापराव पाटील चिखलीकर, आंबेडकरी चळवळीतील ज्येष्ठ नेते माजी नगरसेवक बबनराव निर्मले आणि नगरसेवक प्रा. बालाजी खिल्लारे यांच्याबाबत समाजात गैरसमज पसरवणे चुकीचे असल्याचे प्रतिपादन पॅंथर पावरचे प्रदेशाध्यक्ष तथा लोहा पंचायत समितीचे माजी उपसभापती नरेंद्र गायकवाड यांनी केले.
लोहा येथील शासकीय विश्रामगृहात आयोजित पत्रकार परिषदेत ते बोलत होते. यावेळी बबनराव निर्मले, प्रा. बालाजी खिल्लारे, नगरसेवक सतीश निखाते, नगरसेवक प्रा. केतन खिल्लारे यांच्यासह कार्यकर्ते उपस्थित होते.
जायकवाडी परिसरातील जमिनीच्या मालकीबाबतचा वाद आणि पंचरंगी ध्वजाचे प्रकरण यामध्ये आमदार चिखलीकर यांचा कोणताही संबंध नसल्याचे नरेंद्र गायकवाड यांनी स्पष्ट केले. ध्वज काढण्याच्या प्रकरणातही चिखलीकर, निर्मले आणि खिल्लारे यांना बदनाम करू नये, असे त्यांनी सांगितले.
माजी नगरसेवक बबनराव निर्मले यांनीही गेल्या दोन महिन्यांपासून बौद्ध समाजात गैरसमज पसरवला जात असल्याचे सांगत, चिखलीकर, निर्मले आणि बालाजी खिल्लारे यांची नावे या प्रकरणाशी जोडणे चुकीचे असल्याचे म्हटले.
जमिनीच्या मालकी व संपादनासंदर्भातील कागदपत्रे आणि न्यायालयीन बाबींच्या आधारे वस्तुस्थिती समोर यावी, अशी भूमिका त्यांनी मांडली. पंचरंगी ध्वज हा समाजाच्या अस्मितेचा विषय असून, या प्रकरणात कोणाचीही विनाकारण बदनामी करू नये, असे उपस्थितांनी आवाहन केले.
