इंदापूरच्या जिल्हा व सत्र न्यायालयाने प्रशांत गांधींचा अटकपूर्व जामीन फेटाळला

भाग – १

E R News Marathi

इंदापूर : पुणे जिल्ह्याच्या इंदापूर तालुक्यात १६ एप्रिल २०२६ रोजी पोलिसांच्या तपासातून उघडकीस आलेल्या सुमारे ३५ लाख ५१ हजार रुपयांच्या गुटखा तस्करी प्रकरणातील आरोपी प्रशांत गांधी याला इंदापूर जिल्हा व सत्र न्यायालयाने मोठा धक्का दिला आहे. न्यायालयाने त्याचा अटकपूर्व जामीन अर्ज ४ जुलै रोजी फेटाळला आहे. तसेच न्यायालयाने तपासातील अनेक गंभीर बाबींची नोंद केली आहे. पोलीस तपासात प्रशांत गांधीचा या गुटका प्रकरणात सहभाग स्पष्ट होत असल्याचे नमूद केले आहे.त्यामुळे त्याची पोलीस कोठडी गरजेचे असल्याचे न्यायालयाने स्पष्ट केले आहे.मात्र प्रशांत गांधींचा अटकपूर्व जमीन न्यायालयाकडून फेटाळून देखील तो पोलिसांना तो का सापडत नाही अशी चर्चा इंदापूर मध्ये दबक्या आवाजात होत आहे.

१) इंदापूर न्यायालयाचे निरीक्षण काय आहे.
न्यायालयाने त्यांच्या आदेशात स्पष्ट नमूद केले आहे की, प्रशांत गांधीचे नाव सुरुवातीच्या फिर्यादीत नसले तरी पोलीस तपासादरम्यान त्याचा सहभाग समोर आला आहे. त्यामुळे केवळ फिर्यादीत नाव नसल्याच्या आधारावरत्याला दिलासा देता येणार नाही.

२) न्यायालयाच्या आदेशात पोलिसांचे निरीक्षण काय आहे.
न्यायालयाच्या आदेशानुसार, पोलिसांनी केलेल्या तपासात असे समोर आले की अटक करण्यात आलेला आरोपी क्रमांक एक शकीलकडून प्रशांत गांधीने किराणा माल साठवण्यासाठी संबंधित गोदाम भाडेतत्त्वावर घेतले होते. याच गोदामात मोठ्या प्रमाणात प्रतिबंधित गुटखा, पानमसाला आणि सुगंधी तंबाखूचा साठा आढळून आला आहे. त्यामुळे त्याच्या पोलीस कोठडीतील तपासाची आवश्यकता आहे.

इंदापूरच्या न्यायालयाने पुढे असे नमूद केले आहे की, जप्त करण्यात आलेला प्रतिबंधित गुटका हा प्रशांत गांधीचाच असून तो त्याच्याच रचनात्मक रित्या ताब्यात होता, असे प्रथमदर्शनी दिसून येते. त्यामुळे त्याला न्यायालयाने अटकपूर्व जमीन दिला नसल्याचे कारण आदेशात दिले आहे.
जप्त करण्यात आलेल्या प्रतिबंधित मालाचे प्रमाण अत्यंत मोठे असल्याने या मालाचा स्रोत, पुरवठादार आणि उत्पादक कोण आहेत, याचा शोध घेणे तपासासाठी अत्यंत आवश्यक असल्याचे न्यायालयाने नमूद केले आहे. या संपूर्ण साखळीचा उलगडा करण्यासाठी आणि तपास पुढे नेण्यासाठी प्रशांत गांधीची पोलीस कोठडीतील चौकशी आवश्यक असल्याचे न्यायालयाने स्पष्ट शब्दांत म्हटले आहे. त्यामुळे अटकपूर्व जामीन मंजूर करण्यास न्यायालयाने नकार दिला. 

३) प्रशांत गांधींवर यापूर्वीही अनेक गुन्हे दाखल ?

इंदापूर न्यायालयाच्या आदेशात प्रशांत गांधीविरुद्ध पुणे जिल्ह्यातील विविध पोलिस ठाण्यांमध्ये यापूर्वीही अशाच स्वरूपाचे पाच गुन्हे नोंद असल्याचा उल्लेख करण्यात आला आहे. तसेच प्रतिबंधित गुटख्याचे मानवी आरोग्यावर गंभीर परिणाम होत असल्याने अशा प्रकरणांत कठोर भूमिका घेणे आवश्यक असल्याचेही न्यायालयाने स्पष्ट केले आहे.

पोलिसांनी या प्रकरणातील अटक केलेला पहिला आरोप शकील काजी याने पुणे ग्रामीणचे पोलीस अधीक्षक यांच्याकडे या प्रकणा संदर्भातिल पोलिसांच्या चुकीच्या तपासा विरोधात एक अर्ज केला आहे त्यामध्ये त्याने गंभीर आरोप केले आहेत . त्याच्या या अर्जामध्ये त्याने असे सांगितले आहे की संबंधित गुटख्याचा पंचनामा त्याच्या समोर स्पॉट वर करण्यात आला तेव्हा त्याचा हिशोब ९५ लाख रुपये होत होता, मग फिर्यादीत तो ३५ लाखच एवढाच का दाखवला.तसेच या प्रकरणातून काही आरोपींची नावे वगळण्यासाठी आर्थिक देवाणघेवाण झाल्याचे आरोप शकील काजी यांनी या अर्जातून केले आहेत.

ई आर न्यूज मराठीने उपस्तित केलेले प्रश्न ?

अ ) पोलिसांना प्रशांत गांधी का सापडत नाही ?
ब ) जप्त करण्यात आलेला साठा नक्की किती लाखांचा होता ?
क) शकीलने केलेल्या आरोपा नुसार इतर आरोपींची नावे फिर्यादीतून वगळण्यात आली आहेत का ?