नातेपुतेत ५३ हजारांचा पॅकेज्ड पाणी व मँगो ज्यूसचा साठा जप्त, अन्न व औषध प्रशासनाची मोठी कारवाई 

E R News Marathi

प्रतिनिधी – विनोद लोखंडे 

नातेपुते (ता. माळशिरस) येथील एका आस्थापनेवर अन्न व औषध प्रशासनाने कारवाई करत ५३ हजार रुपये किमतीचा पॅकेज्ड पिण्याचे पाणी आणि मँगो ज्यूसचा १,३८४ लिटर साठा जप्त केला आहे. तसेच संबंधित आस्थापनेला तत्काळ व्यवसाय बंद ठेवण्याचे आदेश देण्यात आले आहेत.अन्न व औषध प्रशासनाला मिळालेल्या गोपनीय माहितीच्या आधारे ही कारवाई करण्यात आली. अन्न सुरक्षा अधिकारी मंगेश लवटे आणि रमाकांत पाटील यांनी नातेपुते येथील सत्यवेल ॲग्रोटेक प्रायव्हेट लिमिटेड या आस्थापनेची तपासणी केली. तपासणीदरम्यान पॅकेज्ड पिण्याचे पाणी आणि मँगो ज्यूसचे नमुने तपासणीसाठी घेण्यात आले. तसेच ५८४ लिटर पॅकेज्ड पाणी आणि ८०० लिटर मँगो ज्यूस असा एकूण १,३८४ लिटर साठा जप्त करण्यात आला. अधिकाऱ्यांच्या प्राथमिक तपासणीत उत्पादनांमध्ये लेबलसंदर्भातील त्रुटी आणि दर्जाबाबत संशय आढळून आला. तसेच अन्न सुरक्षा नियमांचे उल्लंघन झाल्याचे निदर्शनास आल्याने हा साठा जप्त करण्यात आला. पुढील आदेश येईपर्यंत हा साठा आस्थापनातच सुरक्षित ठेवण्यात आला आहे. तपासणीत आढळलेल्या त्रुटी दूर होईपर्यंत संबंधित आस्थापनेला व्यवसाय बंद ठेवण्याचे आदेश देण्यात आले आहेत. ही कारवाई अन्न व औषध प्रशासनाच्या वरिष्ठ अधिकाऱ्यांच्या मार्गदर्शनाखाली करण्यात आली.